Saturday, February 2, 2008

هلوسة 2


ف نفس المكان أرجع
تودينى الدايرة لنقطة البداية
تحوشنى م الخروج عن المسار
عمرى ماجريت ف خط مستقيم
لازم يكون الشكل مقوّس
يا تختفى المعالم
و مايكنش فيه من أساسه
*******
تأليهى لحاجات
هو اللى مقيدنى ف الكرسى
رامينى ورا القضبان
حبسنى جوّا الصندوق
*******
ابتسامتى الهادية
كل ماتحصل مصيبة
وشّى الأحمر
و عيونى المدمعة
لما أتشك بأبرة
أو حد يخبطنى
بيخلونى أتعجب منى
و أسب و أشتم فيها
*******
اختيارى دايمًا
للشنطة الغير مناسبة
و الجزمة الضيقة
بيباوظ الطقم كله
فأقوم أنا بكل نصاحة
بدل م أشترى
جزمة و شنطة جداد
أرميهم وايّا الطقم
و أقعد أعيط جنبهم
*******
مش حتكلم طبعًا عن
تأجيلى لشرا التذكرة
بدون سبب معين
و لا لميعاد محدد
كل مرة يفوتنى القطر
و بكل غباء
أكررها كل يوم
*******
هروبى من قدام
أضعف رياح
رغم إيمانى أنى لو فضلت ثابتة
و جريت عكسها
كان زمانى وصلت
من غير تعب الرجوع
لخط البداية
*******
قلمى اللى تعب
من حماقتى
بيستنجد عشان أبطل
وبطلت
************

5 comments:

Virgo said...

فوضى وكلام كتير
بس هتختفي
أول ما تتبعي الخيط إلى الداخل...
بصبر.

أنا said...

لما يجى الصبر

amraction said...

Simple.. but unbelievablly gorgeous

لسه ما بتخشيش برضه على الاميل.. انتى نسيتى الغلابه اللى زينا ولا ايه..

رئيس جمهوريه نفسى said...

الهلوسه بتعتك كانت مرايه للكل شاف فيها صورتك بدون رتوش تحياتى

أنا said...

رئيس
عندك حق الهلوسة بتطلع اللى جوّا أوى من غير مايكون عيره

شكرًا