Monday, August 17, 2009

جناحتها لسه بترفرف


كان لازم أرجع تانى...كل فترة بدخل أتحسر على نفسى و أخرج من غير ماهمس..أصله مينفعش أفضل بعيدة كده ... كل مدى الحال بيسوء و أنا مش بساعدنى و برفض الأيادى الخارجية .. عرفت أن هنا الترمومتر اللى بيعرفنى أنا لسة بدوّر عليّا و لا خلاص بعت القضية..الكام شهر اللى فاتوا كنت عايشة و خلاص..منتهى السلبية .. بالرغم من أن حصلى حاجات يتكتب عنها بلاوى بس أنا و لا هنا بزعل , أضايق , أعيط و بس ..مقعدتش مع نفسى و أتكلمنا و لا غوصت معاها ذى زمان ..التراب عمل رقات و صواميلى صدت و اخشنت

و حشتنى نفسى ..الكتابة .. الحاجات الصغيرة اللى كانت بطيرنى م الفرح ..و حشتنى رحلتى جوّايا و ريحة البخور اللى خصمتنى
ناس كتير بعدت .. بحاول أكتفى بنفسى على قد ماقدر ..و على قد ماكانت مشاعرى قوية على قد ما بحضنهم جامد عشان ميتسرسبوش ذى زمان

مصممة و حالفة أنى مش حعيشها غير بمبادئى أنا حتى لو لسة بتخبط حدوّر و حلاقيهم و مش حخجل منهم و حكسر القالب اللى كل واحد حتطنى فيه ذىّ ماهو شايفه

اللى جاىّ أصعب بكتير .. و العصفورة عمّالين ينتفوا ريشها و هى بتحاول تلملمه .. أصلهم مش عارفين أن جناحتها بتتولد أقوى كل ماتتبتر

يمكن كلامى مش مترتب بس أنا مفينيش حيل أنمق و لا أراجع هنا كمان

12 comments:

هاني مهران said...

حمدالله ع السلامة

اللخبطة مع النفس موجودة عند كل الناس

اهم حاجة تقررى انك تكونى مستعدة لاى حاجة

وعندك ثقة انك تعدى وتكتبى

تقبلى مرورى

إبـراهيم ... said...

حمد لله ع السلاااامـــة يا نوجا

مدونتك (أنا) نوَّرت ... و عقبالك ما أشوفك عروسة كدهون :)

nudy said...

صديقتي

اهم حاجة ان الواحد يقاوم ويحاول واوعي تاني تستسلمي لكن دايما الضربة اللي ما تكسرنيش بتقويني

اما عن اللخبطة والبحث عن النفس فكلنا متلخبطين وبندور لكن الهروب والبعد دايما بيعطل كل حاجة وده اسهل حل

لا تتركي مدونتك ثانية ودائما في اشد لحظات تعاستك اكتبي وفقط اكتبي فالكتابة تجعلنا نري ملا نريد ان نراه احيانا وتخرج ما بداخلنا دون ان نحس

دائما اسمحي لاصدقاء المخلصين بالوجود بجانبك وان لم يكونوا موجودين ابحثي فربما كانوا بالجوار ولكن لا نراهم وستجدي
حمد الله علي السلامة

YOTTA said...

:) :)

خلي بالك من جناحاتك
.
.
.

Amour said...

خدي وقتك
...
..
.
بس ابقي طمنينا عليكي

mahasen saber said...

مهما تشوفى فى الدنيا اوعى تتخلى عن مبادئك واليى بتؤمنى بيه

هتلاقى اكيد اليى يقدر ده

ربنا ييسرلك كل امورك دايما
وشهر كريم عليكى وعلى كل من تحبين

أنا said...

بحب الحكومة

أهم حاجة أنى مابطلش أتكلم مع نفسى

نورت

أنا said...

تسلم يا إبـــــــــراهيم
تعيش و تشوف سلالتك الكريمة
:)

أنا said...

تعرفى يا نودى .. ساعات أهون على نفسى و أقول أن الحياة لو فضلت ماشية بنفس النغمة -حتى لو نغمة فرحانة – مش حينفع .. لازم أحزن عشان أعرف الفرح , و أقع و أتكسر عشان أدوق القوة من بعدها

تحياتى

أنا said...

مش غايبين عن نظرى يا يوتيتى
.
.
عمرو, تسلم يا غالى

أنا said...

و أنتِ طيبة يا محاسن

Anonymous said...

اول مرة اقرا لك يا نهال عجبتنى كلماتك و افكارك اوى رائعة فعلا