Wednesday, July 2, 2008

عزف منفرد

عزف منفرد لحسين نوح

ساعات بلاقى نفسى بعدت و مش عارفة أشدها ليّا تانى


ده اللى بيحصلى بالظبط ....أنا أستخبيت جواه تابوت و التراب اتردم عليّا و اللى عايشة حياتى ديه واحدة تانية عمالة تهدم كل الى بنيته

حاسة بوحدة و غربة بينخروا ف قلبى و الناس اللى بفضفضلهم دخلوا ف التابوت وايّايّا

الحياة مابقتش حلوة ذى الأول و لا أنا اللى مش عارفة أشوف ؟؟؟؟
...

من كام يوم كنت بقرا ف مذكراتى و انا ف الثانوية , دقت مع كل كلمة طعم راحة لسة فاكراها..... حتى الكام وردة الناشفين اللى صحباتى ادهوملى أيام البراءة , لما بصتلهم لاقيت حياة جواهم و عيون بتضحك..قاعدت أفكر فى أن الأنسان كل مايكبر بيزيد همه برغم من أن الحياة بتيحله فرص أكتر للمغامرة و التلذذ بشعور فك مجهول ورا تانى
...


اللى مش مخالينى أفقد الأمل أنى لسة قادرة أفرحنى بحاجات صغيرة ذى لما شفت راجل عجوز بجلابية و شايل شوال كبير على كتفه نازل من الأتوبيس وبص وراه , حسيت أن كل عضلة فى وشه مسترخيه و عليها شبه ابتسامة بعديها اليوم بطوله كنت مبتسمة من غير سبب
...


بفكر أعمل ذى جرد شهرى للمخزن اللى بيتسرب فيه كل الأحداث المؤلمة بتاعة الشهر و أعرف أسبابها و بعدين أروح ف صحرا بعيدة و أولع فيها و أرجع المخزن أملاه ريحة عود و أزرع فيه ورد قرنفل أبيض ف روز و أفضل طول الشهر اللى بعديه أبعد عن الصحرا ايّاها و أروى الورد و أولع ف بخور العود
...


أحب أختم بكلام الساحر
مهبوش بخربوش الألم و الضياع
قلبى و منزوع م الضلوع انتزاع
يا مرايتى ياللى بترسمى ضحكتى
يا هلترى ده وش والا قناع


4 comments:

Amr Ehab said...

I loved ur blog ya Nehal,
This was my first visit and I hope it won't be my last isA..

Keep going on!!

And happy Birthday for a second time :)

أنا said...

3amoooooooooor

happy 4 ur visit
we anta tayb :)

2ab2a t3ala hena kteeer

YOTTA said...

كل ما اعدى ابقى عايزة اقول ان الكلمتين اللى قلتيهم دول كانو على لسانى
هما هما بالظبط
خصوصا ف حكاية الجرد الشهرى والاحداث اللى عايزة اولع فيها دى
دايما باتخيل نفس المشهد
بس بقيت اضيفله الحته تاعت الورد والقرنفل دى
:S

أنا said...

"بس بقيت اضيفله الحته تاعت الورد والقرنفل دى"

أى خدمة ...عشان تعرفى اننا بننفع برده

لو عرفتى تعمليه أبقى قوليلى لحسن الموضوع منحس معايا أوى

:)